【 又到畢業季啦 】當初滿腔熱情嘅你，依家過成點？

畢業時雄心壯志，而家每日OT到懷疑人生？定係已經搵到自己條路？五個網友同小編分享嘅故事，睇完百感交集……

🎓 網友A｜畢業2年｜廣告業

以為總會捱到成為「創意總監」，點知頭半年淨係幫客買咖啡，同埋將PPT嘅「logo放大啲」。有次我偷偷哋將自己個名加落份proposal度，第二日就被叫入房『教育』咗半粒鐘……

而家學識咗，所謂滿腔熱情，其實同任勞任怨係同義詞，同埋點樣喺凌晨三點崩潰完，第二朝扮無事返工。

不過，上個月個客終於採用咗我諗嘅 idea，嗰刻又覺得呢一切係值得嘅！

👔 網友B｜畢業1年｜銀行HR

以為做HR係幫公司搵人才，點知係做「人肉答題機」：

• 「點解今個月出糧遲咗？」（因為假期啊大佬）

• 「點解我張醫療claim唔到？」（你張收據連名都睇唔清楚...）

• 「點解年年加薪得3%？」（呢個問題我都想知）

日日都要對住Excel同「點解我份糧少咗500蚊」嘅質問。

不過做落發現，其實睇住啲新人由戰戰兢兢到獨當一面，個滿足感都幾正。同埋全公司最八掛嘅原來真係HR，邊個拍拖、邊個想跳槽，我哋永遠第一個知！

💻 網友C｜畢業3年｜IT Freelancer

當年氣焰高昂，覺得自己IT勁，所以唔想幫人打工。雖然而家月入都有成6萬，不過代價係：

• 凌晨3點仲幫個客改緊「個button應該放左定放右」

• 多job時，連續4個月冇假放，連去廁所都要計住時間

• 阿媽到而家都以為我日日係屋企對住電腦，都唔知搞啲咩

不過，自由工作者嘅生活就係咁，一時天堂一時地獄。上個月先豪請全家食米芝蓮，不過今個星期就要食三餸飯啦～

🍜 網友D｜畢業半年｜餐飲業

大學讀酒店管理，一畢業就入咗知名餐廳做見習經理。以為都算係「管理層」，點知都係「全能打雜」 。客人訂位、捉員工儀容、夜晚仲要OT對數。最諷刺係，以前我有GPA 3.5，而家個目標係升正做餐廳經理......

不過做飲食業都有開心嘢，員工之間無辦公室咁多心機同不和，熟客會同你傾下偈、有啲大客仲會畀靚酒你試，有時仲會因為識執生畀啲大老細讚。嗰刻終於明點解阿媽成日話：「出嚟做嘢，識做人緊要過識做事」

😶 網友E｜畢業5年｜現職：失業中

5年換咗7份工，由文員到KOL助理都試過。而家就喺屋企每日send 30份CV，等運到......

最難受唔係冇錢，而係睇住同期畢業嘅人買樓嘅買樓，升職嘅升職，連當年成績最差嘅同學都做起咗小生意。自己？連去同學聚會都要諗藉口唔去。

阿媽成日話：『讀咁多書有咩用？』其實我都想知！唯一安慰係，失業期間學識咗剪片同寫文案，而家諗緊不如做自媒體算數？

總結：

每個人嘅時間軸都唔同，喺自己嘅時區永遠都係準時，所以只要堅持就一定會到達目的地！過程有笑有淚，但大家都經歷緊，我哋一齊撐住！畢業生都唔洗緊張嫁，保持住熱情，行行出狀元呀。

---

近期話題：

職場暗語你要知？聽唔明隨時中箭！

喺職場打滾，除咗要識做嘢，仲要識聽「弦外之音」。好多時上司或同事唔會直接表達意見，而係用一啲委婉嘅說話暗示。如果聽唔明，分分鐘踩中地雷都唔知！以下就分享幾個常見嘅職場暗語，等你可以醒目應對！

「呢件事我哋再討論下」

👉 潛台詞：可能係婉轉拒絕，或者覺得你嘅提案未夠成熟。

✅ 應對：主動提出完善方案，或者問清楚對方嘅顧慮。

「你最近好似幾忙喎」

👉 潛台詞：暗示你工作效率低，或者工作分配唔平均。

✅ 應對：「等我整理下工作進度匯報」

「你同同事關係幾好呀」

👉 潛台詞：你掛住吹水唔做嘢

✅ 應對：「溝通順暢先可以加快合作呀嘛～」

「公司好重視你」

👉 潛台詞：可能想叫你做更多嘢，但未必有實際回報。

✅ 應對：問清楚工作範圍同期望，避免被過度消耗。

「你份人真係有主見」

👉 潛台詞：覺得你經常駁嘴，又唔聽人講

✅ 應對：「我明白團隊合作好重要，大家意見都值得參考。」

「你同其他新人好唔同」

👉 潛台詞：「點解得你咁特別蠢？」

✅ 應對：「係呀，仲有好多嘢要同大家學習」

「公司而家係艱難時期……」

👉 潛台詞：「今年冇花紅，加班費都慳返！」

✅ 應對：「明白，咁公司有冇具體方案幫同事渡過難關？」

總結：

職場暗語處處有，聽得明先至可以避免誤會，甚至把握機會。下次聽到呢啲說話時，不妨停一停、諗一諗，揣摩背後嘅真正意思，咁先至可以喺職場上越行越順。喺辦公室生存，唔止要識做，更要識聽呀！

---

近期話題：

💡 史上最唔Hea嘅【💥見工核彈級求生包 】‼️ 教你對付面試時HR嘅20條爛題目‼️

⚠️ 閱讀注意事項：

你自己練習，自己理解精髓，自己轉化一下更合適答案，全部靠自己…

HR：「自我介紹吓！」

分析：想知你識唔識 highlight 自己強項，同份工有冇關聯。

答：「我本身做開 Digital marketing，最叻搞社交媒體 campaign。上份工幫公司FB增粉，半年多咗3倍，仲試過一條片過百萬 views！見你哋公司專做呢個市場，我諗我啲橋應該啱用～」

HR：「點解你CV轉工咁密？」

分析：驚你慣性跳槽。

答：「頭兩份工想試清自己方向，後來做e-commerce一做3年，仲升埋職。而家想揾間可以長遠發展嘅公司，見你哋文化夠穩定，好啱我！」

HR：「你期望幾多人工？」

分析：壓價前奏。

答：「我見市場價呢個位大概$25K-30K，不過我都想了解吓公司福利同晉升制度，如果發展空間大，可以再傾～」（反客為主）

HR：「你最大缺點係咩？」

分析：睇你識唔識「化缺點為優點」。

答：「我有時太執著細節，試過為咗個PPT動畫搞到OT！後來學識set deadline，同同事分工check漏，而家效率高咗好多～」（缺點變進步故事）

HR：「點解空白期咁長？」

分析：驚你躺平或能力脫節。

答：「之前辭職陪阿媽做手術，順便進修咗個Google數據分析證書。嗰陣仲幫朋友搞網店，用FB Ads幫佢哋生意升咗50%，而家ready返全職！」（顯示積極）

HR：「你點樣應付厭惡性工作？」

分析：睇你捱得定揀擇。

答：「將佢變成game！例如執數據時計時破自己紀錄，或者做完沉悶報表獎勵食雪糕。其實最緊要明點解要做，有價值就唔怕做～」

HR：「點解我要請你？」

分析：考你點sell自己。

答：「我會帶客源、實戰經驗、技能幫助公司！例如以前用開嘅策略及成功經驗，我相信好快就見到成績！」

HR：「如果同上司意見不合點算？」

分析：睇你係「硬頸」定識溝通。

答：「我會準備數據同案例支持自己諗法，但最後都尊重上司決定。之前試過跟老細方法做，結果客數跌，佢反而主動叫我下次提出嚟再傾～

HR：「如果你發現上司出錯點處理？」

分析：測你政治敏感度。

答：「私下用請教方式提一提。例如，試過上司計錯優惠期，我話『可能我搞錯，不過系統顯示截止日係聽日喎』，佢醒水即刻改～」

HR：「點說服唔願合作嘅同事？」

分析：團隊協調能力。

答：「試過有個designer嫌改圖麻煩，我拎數據話佢知新版本點擊率高30%，仲話做完請食下午茶。最後佢主動提議加多個動畫～」（利誘＋數據）

HR：「你點樣處理客投訴？」

分析：危機公關能力。

答：「先道歉再即時補鑊。有客試過收錯貨，我哋即日補送加送禮物卡，佢後來仲做埋VIP客，每年幫襯過百萬～」

HR：「你點樣處理壓力？」

分析：驚你頂唔順會爆。

答：「我會將大project拆開細task，set每日to-do list。試過連續一個月趕pitch，晚晚跑步半粒鐘減壓，最後仲成功攞到百萬訂單！」（有方法有成果）

HR：「你點樣保持學習新嘢？」

分析：怕你食老本。

答：「每朝睇15分鐘行業newsletter，上個月仲自學MidJourney整公司活動海報。最近研究緊點用ChatGPT寫personalized推廣文案～」（具體行動）

HR：「你覺得同行業最大挑戰係咩？」

分析：考行業洞察力。

答：「短視頻疲勞症，而家要內容+娛樂+優惠三合一。我最近研究互動式直播，觀眾即時投票決定產品折扣，轉化率比傳統高2倍～」

HR：「五年後你想做到咩位？」

分析：睇你有冇野心同規劃。

答：「希望成為業內頭10%嘅營銷專家，帶團隊打入國內市場。當然，都要睇公司發展，如果公司擴張得快，我隨時ready幫手開新team！」（有目標又唔離地）

HR：「點解你上份工無升職？」

分析：質疑你能力或野心。

答：「公司細架構扁平，但我負責範圍3年內業績擴張咗3倍。舊年老細口頭承諾加我薪金及升職，不過我想轉更大平台發展～」（將缺點變優勢）

HR：「工作上最失敗經歷係咩？」

分析：睇你識唔識「失敗中成長」。

答：「試過搞網上講座得10人參加，後來發現target錯咗中年群組。之後學識用A/B test篩客，同一活動再做有300人報名～」（失敗變教材）

HR：「你點解成日OT？係咪效率低？」

分析：質疑工作模式。

答：「我習慣早半個鐘返公司規劃日程，OT多數係因為突發客急單。不過舊年開始用automation工具，而家準時收工仲keep到客滿意度95%！」（解釋原因＋進步）

HR：「有冇其他公司請緊你？」

分析：想知你搶唔搶手，同有幾想入呢間。

答：「有兩間見緊第二輪，不過你哋公司個新AI項目我好有興趣，同我嘅技能好夾，所以今日特別期待嚟見！」（暗示：你快手啦）

HR：「仲有咩想問我哋？」

分析：最後表現興趣機會！

答：「想知部門未來半年最重點項目係咩？等我返去可以做定research，如果有幸加入，想第一時間貢獻idea～」（殺手級結尾）

---

近期話題：